ಪ್ರವಾಸಿ

೧

ಹೌದು, ನಾನು ಪ್ರವಾಸಿ

ಜವಾಬ್ದಾರಿಗಳ ಗಂಟುಗಳನ್ನು 

ಹೊತ್ತು ತಂದ ಪೆಟ್ಟಿಗೆಯಲ್ಲಿ

ಕನಸುಗಳನ್ನು ತುಂಬುವವನು. 

೨

ಕನಸುಗಳನ್ನು ತುಂಬಿ ತುಂಬಿ

ನನಸಾಗಿಸಲು ಒದ್ದಾಡಿ ಒದ್ದಾಡಿ

ಇರುವ ಒಂದೇ ಬದುಕು ಮುಗಿಸಿ

ಶವ ಮಂಚಕ್ಕೆ ಹತ್ತಿರವಾಗುವವನು.

೩

ಇಂದಲ್ಲ ನಾಳೆ ಬಂದೇ ಬರುವನು

ನನ್ನೊಡನೆ ಸೇರಿ ಇಲ್ಲೇ ಇರುವನು

ಎಂದು ಕಾದು ಕೂತ ಕಣ್ಣುಗಳಿಗೆ

ಮರಣ ದಂಡನೆ ವಿಧಿಸಿದವನು.

೪

ಬಿಡುವಿರದ ಕೆಲಸದ ಗೊಡವೆ

ನಿದ್ದೆ ಬರದ ಇರುಳಿನ ನಡುವೆ

ಊರವರ ನೆನಪಿಸಿಕೊಂಡರೂ

ಅವರ ಮನದಲ್ಲಿ ಮರೆತವನು .

೫

ನಿರೀಕ್ಷೆಗಳು ಹುಸಿಯಾದಾಗ 

ದುಃಖ ದುಮ್ಮಾನ ಸಹಿಸಲಾಗದೆ

ನಿರಾಸೆ ಹತಾಷೆಗೊಳಗಾಗಿ

ಯಾರೂ ಕಾಣದಂತೆ ಅಳುವವನು. 

೬

ಹೌದು, ನಾನು ಪ್ರವಾಸಿ

ಅಲ್ಲಿ ನಿಲ್ಲಲಾಗದೆ ಇಲ್ಲಿ ಇರಲಾಗದೆ

ತನ್ನವರ ಬದುಕಿಗಾಗಿ ಜೀವ ಸವೆಸಿ

ಅವರ ಕುಶಿಯಲ್ಲಿಯೇ ತ್ರಪ್ತಿ ಪಟ್ಟವನು.

ಫಾರೂಖ್ ಕುಕ್ಕಾಜೆ